Agaciro k’ijambo ry’Imana Agaciro k’ijambo ry’Imana

Yanditswe kuya 16-01-2019 na fils

2PETERO 1.19
Nyamara rero dufite ijambo ryahanuwe rirushaho gukomera, kandi muzaba mukoze neza nimuryitaho, kuko rimeze nk’itabaza rimurikira ahacuze umwijima rigakesha ijoro, rikageza aho inyenyeri yo mu ruturuturu izabandurira mu mitima yanyu.

Iri jambo riratwereka uburyo dukwiye guha agaciro ijambo ry’Imana, kuko uko bwije n’uko bucyeye ritajya risaza, ahubwo rihora ari rishya,
Kandi uhereye cyera cyane rifite imbaraga : rihorana umwimerere waryo kuko ridahinduka ubwaryo cyangwa ngo rihindurwe n’ibihe ;

Ribasha kugenzura ibiri imbere mu mutima w’umuntu, kandi ni na ryo rituyobora inzira nyakuri dukwiye kunyuramo ;

Ni ryo abera bahawe rimwe gusa, hanyuma Kristo Yesu arihamirisha imbaraga nyinshi z’Umwuka Wera, rishimangirwa n’amaraso ye y’igiciro cyinshi yaviriye ku musaraba i Gologota ;

Imana rero nawe iguhe kuririnda kandi igushoboze kurigundira : icyo kibitsanyo kiza wahawe ukirindishe Umwuka Wera Yesu yadusigiye.

Kuko uwo Mwuka Wera ari we gusa wagushoboza kurikomeza no kuzinukwa iby’isi,
uzirikana ko turi ishyanga ryera, kandi ko gukora gutyo ari byo bihesha ubugingo buhoraho.

Ku bw’ibyo, icyo usabwa gukora muri iki gihe Uwiteka akigutije ubuzima ni iki : gukunda Kristo Yesu kandi ugakurikiza rwose icyo ijambo rye rigusaba ;

Sigaho kujya uvangavanga ibintu : wirinde ibirangaza byinshi biri hanze aha, kuko ni byo bituma abantu baba mu nzu y’Imana ariko barazanywe no gusaba Imana indamu z’isi gusa aho gushaka iby’ubugingo buhoraho.

Guha agaciro ijambo ry’Imana ugahindishwa na ryo umushyitsi ku bwo kuryubaha kugira ngo ubone uko ukurikiza icyo rigusaba ni itegeko twasigiwe na Kristo Yesu rireba umuntu wese wahamagawe n’Imana Data.

Mwakire neza Ijambo ry’Imana.

AGAKIZA.org



ANDIKA ICYO UTEKEREZA


IBITEKEREZO


ADEPR Tweets











ADEPR Facebook